Lajme 9

Bariç shpall listën anti-Angli

Ashtu edhe siç kishte lajmëruar, trajneri i kombëtares shqiptare, Oto Bariç shpalli dje listën zyrtare të futbollistëve që ka grumbulluar për ndeshjen miqësore kundër Anglisë, e cila do të zhvillohet më 25 maj në ishullin britanik. Në listë, e cila përbëhet nga 20 emra ka edhe katër hyrje të reja në ekipin tonë përfaqësues. Kështu, mbrojtësit Andi Lila, Kristi Vangjeli, Endri Vrapi si edhe sulmuesi Vioresin Sinani do të kenë mundësi që të veshin për herë të parë fanellën kuqezi. Gjithashtu, për takimin miqësor kundër “luanëve” janë rikthyer në kombëtare lojtarë si Ervin Skela pas disa muajsh mungese, Edvin Murati si edhe Julian Ahmataj.Kryesisht, futbollistët që tashmë kanë konfirmuar pjesmarjen e tyre në ndeshjen kundër Anglisë janë nga kampionati shqiptar duke qenë se disa prej legjionarëve që nuk do të marrin pjesë janë të angazhuar me ekipet e tyre nëpër Europë. Plot pesë lojtarë të formacionit të kuqezinjve do të mungojnë në këtë ndeshje. Kështu, tre mbrojtësit, Elvin Beqiri, Debatik Curri dhe Armend Dallku që luajnë në Ukrainë nuk do të luajnë më 25 maj duke qenë se kampionati në këtë shtet përfundon në mes të qershorit. Gjithashtu, Bariç nuk do të ketë në dispozicion as sulmuesin kryesor Erjon Bogdani, i cili luan me Kievon në Itali dhe as mesfushorin shkatërrues Lorik Cana që aktivizohet me Marsejën në Francë. Ndërkohë, që sërish është lënë jashtë ekipit përfaqësues portieri i përjashtuar nga Dinamo, Ilion Lika. Ja lista e plotë e 20 futbollistëve që janë thirrur nga tekniku kuqezi, Oto Bariç për ndeshjen miqësore kundër Anglisë, e cila do të luhet më 25 maj në ishullin britanik. Arjan Beqaj, Isli Hidi, Andi Lila, Nevil Dede, Blerim Rustemaj, Kristi Vangjeli, Endri Vrapi, Devi Muka, Ervin Bulku, Altin Lala, Ervin Skela, Altin Haxhi, Edvin Murati, Jahmir Hyka, Klodian Duro, Julian Ahmataj, Vioresin Sinani, Alban Bushi, Edmond Kapllani, Besart Berisha. Ky takim do t’i shërbejë kryepankinës shqiptare për të parë formën e kuqezinjve si edhe për të aplikuar skema të reja lojë përpara dy ndeshjeve eliminatore që përfaqësuesja jonë do të zhvillojë në fillim të qershorit kundër Luksemburgut. Megjithëse shumë prej legjionarëve që luajnë në formacion nuk mund të marrin pjesë në këtë takim miqësor, kroati ka deklaruar se do të shohë gjendjen e të rikthyerve Edvin Murati dhe Ervin Skela. Gjithashtu Bariç do të provojë edhe të rinjtë Vangjeli, Rustemaj si edhe Hyka që është aktivizuar vetëm dhjetë minuta me fanellën kuqezi në miqësoren e shkurtit kundër Maqedonisë. Ndërkohë, që Federata Shqiptare e Futbollit është duke punuar edhe për akomodimin e skuadrës në Angli. Është vendosur që grumbullimi i skuadrës të nisë më 22 maj në vendin tonë për tu nisur më pas menjëherë drejt ishullit britanik duke qenë se shumë lojtarë që do të marrin pjesë në këtë takim miqësor janë nga kampionati shqiptar. Ndërsa lojtarët e tjerë që aktivizohen jashtë do të duhet që të udhëtojnë direkt për në Londër. Kuqezinjtë do të zhvillojnë dy ditë stërvitje në një prej stadiumeve të qytetit të Londrës. Ndeshja do të luhet më 25 maj në stadiumin “Turf Moor” në periferi të Londrës në orën 20:55.