Lajme 7

Kurthi me dopingun e Fetie Kasajt

Peshëngritësja shqiptare Fetie Kasaj, ka akuzuar presidentin e Federatës Esat Ademi, si shkaktarin e kapjes së saj me doping në Europianin e zhvilluar në Strasburg një muaj më parë. Nënkampionia e Evropës rrezikon dy vjet pezullim dhe heqje të titujve të fituar në rast se edhe në testin B do të rezultojë pozitive. E përlotur, sportistja shqiptare me rezultatet më të larta në vitet e fundit, ka thënë para kamerave se ajo e dinte që kishte probleme të kësaj natyre, prandaj edhe nuk dëshironte që të merrte pjesë në Europianin që u zhvillua në Strasburg. "Unë në datën 7 prill pata bërë një kontroll mjekësor gjinekologjik dhe kisha disa probleme të miat personale. Megjithatë e dija se ilaçet që përdora për atë problem mund të jepnin ndonjë ndikim dhe për këtë kërkova që të mos marr pjesë në kampionatin europian. Por, ishte presidenti i Federatës Esat Ademi ai që më siguroi se nuk do ta kisha probleme dhe se në krahun tim do të dilte ai", është shprehur peshëngritësja shqiptare. Tepër e prekur nga faksi i ardhur në FSHF nga ana e Federatës Botërore, Kasaj u shpreh se ajo ka përdorur vetëm ilaçe me këshillën e mjekut dhe aspak substanca të ndaluara që do të rrisnin forcën trupore të saj. Ajo është gjetur me një sasi të madhe të stanozololit, një nga substancat të rreshtuara nga ËADA (Agjencia Botërore e Anti-Dopingut) si rreptësisht e ndaluar. "Në kontrollin e urinës të bërë tek peshëngritësja Fetie Kasaj, është gjetur një substancë e palejueshme", shkruhet në analizat e sjella nga laboratori i Këlnit në Gjermani.
Kurthi
Si Fetie Kasaj, ashtu edhe trajneri i saj Faruk Kalleshi kanë mbështetur faktin se ata e dinin që do të kishin probleme, por ndaj tyre gjithçka ka qenë si një kurth. "Presidenti Ademi pagoi edhe 100 mijë lekë që Fetija të bënte analizat dhe i tha që nuk do të kishte probleme, madje foli duke rrahur gjoksin. Por, ne e dinim që një gjë e tillë mund të ndodhte, pavarësisht se i besuam fjalës së tij. Ne gjuhën shqipe kjo quhet prerje në besë", u shpreh trajneri Faruk Kalleshi. "Veç kësaj, nuk kuptova përse Federata duhet ta bënte kaq shpejt publik këtë lajm, pa më sqaruar mua njëherë. Mos ndoshta Federata kishte ndërmend të më shkatërronte? Unë kam marrë pjesë në shumë gara dhe asnjëherë nuk kam pasur probleme apo të kem përdorur substanca të ndaluara, por e thashë që kisha probleme gjinekologjike", u shpreh më tej shtangistja nënkampione e Evropës. Fetie Kasaj ka konfirmuar gjithashtu se do të bëjë edhe testin B, megjithatë shansi i saj kryesor është dalja përpara Panelit të Shqyrtimit në Federatën Botërore, ku me anë të dokumentit që provon analizat e saj gjinekologjike, mund të bëjë që vendimi për pezullim të ndryshojë, ndonëse heqja e titullit duket se është një gjë e sigurtë tashmë.