Jalë, zbulohet plani sekret i qeverisë

E mbani mend Jalën? Po fadromat e Ndërtimores që shkatërronin hotele dhe lokale të ndërtuara pranë plazhit? Më në fund, a ju kujtohet se si e pati akuzuar aleati politik Vangjel Dule, Kryeministrin, për "interesa të paligjshme" në këtë zonë? Të gjitha këto detaje, të veçuara e pa lidhje në dukje, mund të kenë një sfond, një motiv më mirë. Pas këtij aksioni të bujshëm në perlën e bregdetit shqiptar, pas reagimeve të ashpra dhe hedhjes së dyshimeve nga politika dhe mediat se Berisha "ka një plan", revista "MAPO" bën publik një projekt turistik, i cili vërtet është më i gjerë se Jala e vogël, porse ka rënë në një dorë që ndoshta fsheh diçka. Kryeministri Berisha mban prej javësh mbi tryezën e tij të punës një superstudim për bregdetin, në jug të vendit, i cili parashikon ndërtimin e resorteve turistike, pjesë e të cilit është dhe zona në Jalë.

Projekti
Projekti i quajtur "Integrated Coastal Development Study and Plan", ka përfunduar në shkurt të vitit 2006 dhe është hartuar nga "Njësia e Menaxhimit të Projektit" e cila drejtohet nga dhëndri i Kryeministrit, Jamarbër Malltezi. Studimi ka qenë vetëm pjesa e parë e projektit, për të cilin qeveria shqiptare i ka marrë (për totalin e projektit) rreth 38 milionë euro kredi, Bankës Botërore. Materiali i disponuar përfaqëson vetëm studimin e projektit, ndërsa fazat e tjera do të jenë miratimi dhe zbatimi i tij në terren. Projekti "Integrated Coastal Development Stdudy and Plan", që Kryeministri nuk e bën publik, saktëson numrin dhe katet e hoteleve që priten të ndërtohen në Jalë, por këtë herë "me leje". Kjo histori nuk mbaron me kaq. Qeveria disponon të dhëna të sakta e të detajuara edhe për zonat e tjera të përzgjedhura nga studimi, që tashmë disponohen të plota e të detajuara edhe nga "MAPO". Sipas këtij projekti tejet ambicioz, për gjithë bregdetin jugor, pritet që të kthehen në fshatra turistike dhe zonat e Palasës, Dhërmiut, Vunoit, Himarë-Livadhjasë, Himarë-Pilurit, Porto Palermos, Qeparoit të vjetër etj. Nuk mund të mungonte dhe Kakomeja. Projekti në fjalë ka legjitimuar dhe ndërhyrjet e kryera në këtë fshat në vitin 2005, me urdhër të ish-kryeministrit Fatos Nano.
Në fund të vitit 2005, qeveria e kryesuar nga kryeministri Sali Berisha vendos të hartojë një projekt ambicioz, për zhvillimin e turizmit në zonat bregdetare të jugut të vendit. Për të vënë në jetë këtë qëllim, qeveria kontaktoi Bankën Botërore, së cilës i kërkoi një hua prej 38 milionë eurosh në total, me të cilat do të realizoheshin të gjitha fazat e projektit. Banka Botërore pranoi kërkesën e qeverisë shqiptare. Për pasojë, qeveria ishte "e detyruar" të fillonte punën për krijimin e Njësisë së Menaxhimit të Projektit, të pagëzuar "Integrated Coastal Development"

Fshehja e studimit
Në të gjithë panoramën e zhvillimeve të kësaj çështjeje, ka shumë pikëpyetje. Së pari, lidhur me fshehtësinë me të cilën qeveria po e trajton këtë projekt. Asnjë prej grupeve të interesit apo faktorëve të tjerë social-politikë në vend, nuk kanë qenë dhe ende nuk janë të informuar në lidhje me ecurinë dhe rezultatet e fazës së studimit që disponon revista "MAPO". Ndërsa ndërhyrja në Jalë ka prekur pikërisht ato territore, të cilat janë rrethuar me shirit të kuq në projekt, kryeministri Berisha e justifikon aksionin e ndërtimorëve në këtë zonë vetëm me "parullën" e prishjes së ndërtimeve pa leje! Cila është arsyeja që e bën kreun e qeverisë të mos shqiptojë asnjë germë, për një projekt që prej më shumë se një viti e mban mbi tavolinë?! Më tej, do të duhet që ky studim t'i paraqitet KRRTRSH-së për miratim, e nëse kjo e fundit e miraton, atëherë studimi i publikuar sot për herë të parë nga revista "MAPO", do të jetë Master-Plani ligjor për ndërtimet në vijën jugore të bregdetit shqiptar. Një tjetër fakt i dyshimtë lidhet dhe me "garniturën", që shoqëroi ndërhyrjen e qeverisë në Jalë. Pak ditë pas aksionit në Jalë, ndërhyrja e fadromave u përqendrua tek-tuk edhe në zona të tjera të vendit, por që në mënyrë të çuditshme në këto zona qeveria u mjaftua vetëm me disa minuta aksion, që më shumë se aksion alla-ndërtimor u shndërrua në aksion të pastër mediatik. Këto veprime të mëvonshme, ndezën dyshime të forta se qeveria po përpiqej të hiqte vëmendjen nga shkatërrimet e papritura që ndodhën në Jalë.
Pasi "MAPO" siguroi projektin e mbajtur sekret, kërkoi menjëherë të kontaktonte Njësinë e Menaxhimit të Projektit. Me shumë kujdes, drejtuesi i kësaj agjensie, Malltezi na komunikoi se axhenda e tij e ngjeshur, nuk i jepte kohë për t'i dhënë përgjigje interesimit tonë. Gjithsesi, ai na siguroi se tre bashkëpunëtoret e tij në këtë zyrë do të ishin në dispozicion. Duke mos patur tjetër mundësi iu drejtuam nëpunësve të "Njësisë së Menaxhimit të Projektit", pa e ditur se materiali për të cilin po interesoheshim do të na kthente në gazetarë "non grata". I gjithë "zelli bashkëpunues" i treguar në fillim nga punonjëset e zyrës, u shua porsa ato shfletuan materialin që ne i dorëzuam, e që për ironi nuk ishte gjë tjetër, veçse një produkt i thurur dhe i elaboruar pikërisht nga kjo zyrë koordinimi. "Përse keni ardhur këtu? Përse na i tregoni këto? Ju lutem më tregoni pak kartat që vërtetojnë se jeni gazetarë. Unë nuk do t'u kthej asnjë përgjigje për këto që ju më pyesni",- tha ndër të tjera, në fund të "takimit", njëra prej tre punonjëseve të projektit "Integrated Coastal Development".