Lajme 12

Nano: Pas “Presidentit”, nis lëvizjen e re politike
Ish-kreu i PS tha dje se nëse do të humbasë në garën për President do përqendrohet në krijimin e një fraksioni politik që do të punojë për interesat e vendit

Ish-Kryetari i PS-së, Fatos Nano deklaroi dje se nëse do të humbasë në garën për President të Republikës, vëmendja e tij do të përqendrohet në krijimin e një fraksioni politik që do të punojë për interesat e vendit. Këtë deklaratë Nano e ka bërë gjatë një interviste për VOA. “Politika nuk është një sferë e ngushtë që të lejon të zgjedhësh mes dy alternativave. Unë e quaj çështje parimore dorëheqjen nga PS për shkak të humbjes në zgjedhjet parlamentare. Kjo më ka ndihmuar të vendos një distancë tjetër në politikë. Kam kuptuar më mirë se raportet e politikës me shoqërinë duhet të transformohen, profesionalizohen dhe të mos cënohen më nga konflikte personale që mund të cënojnë interesat e Shqipërisë për integrimin’, u shpreh Nano në këtë intervistë. Ky do të jetë militantizmi im në të ardhmen. Do të mundohem të sjell sa më shumë faktorë në procesin e integrimit që shmang konfliktet. Më tepër se sa një parti e re do të jetë një proces politik që do krijonte një frymë bashkëpunimi bipartzizan. Dhe nëse kjo lëvizje kthehet në partinë më të suksesshme, votuesit shqiptarë do të më mbështesin tani dhe më vonë”, deklaroi Nano. Ai ka lënë të kuptohet dje, se pret një mirëkuptim nga Edi Rama dhe deputetët e PS-së për kandidimin e tij. Pas pjesëmarrjes në konferencën për 1 vjetorin e MSA-së, Nano u shpreh se “identiteti im është i përcaktuar, është opozitar, është bipartizan dhe është kundër konflikteve. Mbi këtë bazë jam i sigurt se mbështetja nuk do të mungojë. Mbi këto baza dua të falënderoj grupin parlamentar të PS-së që po shkon drejt konsenseve të nevojshme”, - tha Nano. “Paktet politike asnjëherë nuk janë të panevojshme, dhe aq më tepër nëse flasim për një pakt kombëtar midis palëve politike për zgjedhjen e Presidentit, që i shërbejnë zhvillimit dhe integrimit”, - deklaroi Nano, një ditë pasi grupi parlamentar ishte përfshirë nga debate të ashpra mes deputetëve mbëhstetës të kandimit të tij dhe kryetarit Rama.