Lajme 10

Fergusson: Vë bast se Milan fiton Championsin

Alex Ferguson, trajneri i skuadrës së Mançester United në një deklaratë që ka dhënë për ‘Sun’, duke kujtuar përfundimin e ndeshjes 3-0, ku kuqezinjtë janë eliminuar nga Championsi në “San Siro” thekson: “Kundër nesh në kthimin e gjysmëfinales, ka arritur një fitore fantastike, të mrekullueshme dhe të jashtëzakonshme. Ndër të tjera Milani ishte më i freskët sesa ne, ishte më shumë i përgatitur nga këndvështrimi fizik dhe mendor. Ne kishim shpenzuar shumë në fushën e Everton, pak ditë më parë duke përmbysur rezultatin nga 0-2 në 4-2.Ende po përpiqem të analizoj dhe të kuptoj motivet e humbjes me kuqezinjtë, e vërteta është se Milan ka paraqitur një ndër prezencat më prestigjioze të të gjithë historisë. Dhe me pak fjalë Milani është fituesi i Champions League dhe unë do të ngre dolli me verën që më ka dhuruar Ancelotti”, vazhdon të shprehet ndër të tjera Ferguson me vështrimin e drejtuar nga finalja e 23 majit në Athinë. “Vë bast se do të fitojë Milan, jam mëse i sigurt. Në fund të ndeshjes së kthimit, i kam thënë Carlos se në këtë pikë, nuk mund të humbas turneun. Ai më dhuroi një shishe të mrekullueshme vere, dhe unë i thashë menjëherë se një dhuratë të tillë, kaq të bukur nuk ka vlera nëse ai humbet finalen. Për këtë arsye i kam thënë se do të ngre dolli me verën e tij kur të ketë ngritur lart kupën”. Ferguson, i cili sapo ka fituar titullin kampion të Anglisë, nuk ka asnjë dyshim, këtë herë sipas tij, Milani do të jetë fitues në ndeshjen që do të realizojë me Liverpulin. Ndërsa Milani përgatitet për fitoren, Galliani fton sulmuesin ukrainas, Andry Shevçenko duke i thënë që të kthehet sërish në “San Siro”: “Shevçenko ka mbetur në zemrën e Milanit dhe vendi që ka mbetur i lirë nga të huajt, është i rezervuar për të, edhe për disa muaj të tjerë”. Me këtë fjalë është shprehur Adriano Galliani, gjatë paraqitjes së marrëveshjes së re të sponsorizimit me Eagle Pictures. Galliani ndër të tjera ka kujtuar edhe faktin se Milani ka një vend që do të lirohet nga të huajt sepse tashmë Kaka është bërë italian, dhe në rast se Sheva do të pranojë, dihet që vendi është i rezervuar për të”. Administratori i deleguar milanist nuk ka asnjë dyshim për kthimin e ukrainasit që do të jetë e pranuar nga të gjithë: “Ju sigurojë, që jo vetëm shoqëria do ta presë me krahë hapur, por edhe trajnerët dhe lojtarët” ka përfunduar Galliani. Ndërkohë, që Milan është duke u përgatitur tashmë për ndeshjen më të rëndësishme të sezonit, finalen e Ligës së Kampioneve kundër Liverpulit, e cila do të luhet më 23 maj në kryeqytetin e Greqisë, Athinë. Kjo finale përsëritet sërish pas dy vjetësh teksa në sezonin 2004-2005 Liverpuli arriti të fitojë trofeun pas goditjeve të penalltive.